শোণিতপুৰৰ নাবালিকাৰ মৃত্যু আৰু চিকিৎসাৰ গাফিলতি: মুখ্যমন্ত্ৰীলৈ ন্যায়ৰ আহ্বান| Nelive24

শোণিতপুৰ জিলাৰ নদুৱাৰ সমষ্টিৰ অন্তৰ্গত নয়নপুৰ গাঁৱৰ নৱম শ্ৰেণীৰ ছাত্ৰী ৰোশনী চেত্ৰীৰ কৰুণ আৰু অকাল মৃত্যুৰ ঘটনাই বৰ্তমান সমগ্ৰ ৰাজ্যজুৰি তীব্ৰ চাঞ্চল্যৰ সৃষ্টি কৰিছে। এগৰাকী নাবালিকা ছাত্ৰী যৌন নিৰ্যাতনৰ দৰে জঘন্য অপৰাধৰ বলি হোৱাৰ পিছত সংঘটিত হোৱা এই কৰুণ মৃত্যুৰ খবৰে সমগ্ৰ সমাজৰ বিবেকক গভীৰভাৱে জোকাৰি গৈছে। এই নৃশংস ঘটনাৰ সৈতে জড়িত থকাৰ অভিযোগত শোণিতপুৰ জিলা আৰক্ষীয়ে ইতিমধ্যে মূল অভিযুক্তক গ্ৰেপ্তাৰ কৰি জেল হাজোতলৈ প্ৰেৰণ কৰিছে। আৰক্ষীৰ এই ক্ষিপ্ৰ পদক্ষেপক ৰাইজে ধন্যবাদ জ্ঞাপন কৰিছে যদিও সমগ্ৰ ঘটনাৰ এটা ফাষ্ট ট্ৰেক তদন্ত সম্পন্ন কৰি সকলো দোষীক দৃষ্টান্তমূলক শাস্তি প্ৰদান কৰাৰ দাবী বৰ্তমান সৰ্বত্ৰে জোৰদাৰ হৈ পৰিছে। ন্যায়ৰ স্বাৰ্থত এই সমগ্ৰ প্ৰক্ৰিয়াটো স্বচ্ছ, নিৰপেক্ষ আৰু সময়মতে সম্পন্ন হোৱাটো অতি প্ৰয়োজনীয় বুলি সচেতন মহলে মত প্ৰকাশ কৰিছে।
এই স্পৰ্শকাতৰ ঘটনাটোৰ তদন্তৰ দাবী তীব্ৰতৰ হোৱাৰ সমান্তৰালভাৱে চিকিৎসা মহাবিদ্যালয়ত ভুক্তভোগী নাবালিকা গৰাকীয়ে সন্মুখীন হোৱা চিকিৎসাৰ চৰম অৱহেলাৰ অভিযোগেও এতিয়া পৰিস্থিতি অধিক জটিল কৰি তুলিছে। দুখীয়া আৰু নিৰ্যাতিত লোকসকলে যদি উপযুক্ত চিকিৎসাৰ অভাৱত চৰকাৰী চিকিৎসা মহাবিদ্যালয়তে জীৱনৰ সৈতে হাৰ মানিবলগীয়া হয়, তেন্তে এই চৰকাৰী চিকিৎসা মহাবিদ্যালয়সমূহ আচলতে কাৰ বাবে বুলিও এতিয়া গুৰুতৰ প্ৰশ্ন উত্থাপিত হৈছে। এই গুৰুতৰ অৱ্যৱস্থাৰ বিৰুদ্ধে কঠোৰ ব্যৱস্থা গ্ৰহণ কৰিবলৈ ঢেকিয়াজুলি সমষ্টিৰ বিধায়ক তথা স্বাস্থ্যমন্ত্ৰী অশোক সিংঘাল আৰু চিকিৎসা মহাবিদ্যালয় পৰিচালনা সমিতিৰ অধ্যক্ষ তথা বৰচলাৰ বিধায়ক ঋতুবৰণ শৰ্মাক দৃঢ়তাৰে আহ্বান জনোৱা হৈছে। একেদৰে, নদুৱাৰৰ বিধায়ক পদ্ম হাজৰিকাইয়ো অতীতত স্থানীয় গোৰ্খাসকলৰ প্ৰতি আগবঢ়োৱা প্ৰতিশ্ৰুতিসমূহ সাৰোগত কৰি এই স্পৰ্শকাতৰ ঘটনাত এক গুৰুত্বপূৰ্ণ তথা সক্ৰিয় ভূমিকা পালন কৰিব লাগে বুলি স্থানীয় ৰাইজে দাবী তুলিছে।
আনহাতে, সমগ্ৰ ঘটনা সন্দৰ্ভত ৰাজ্যৰ মুখ্যমন্ত্ৰী তথা গৃহমন্ত্ৰী ড° হিমন্ত বিশ্ব শৰ্মাক বিশেষভাৱে অনুৰোধ জনোৱা হৈছে যাতে এই স্পৰ্শকাতৰ গোচৰটোত কোনো প্ৰভাৱশালী লোকৰ হস্তক্ষেপ নচলে। সত্য যাতে কোনো পৰিস্থিতিতে গোপন হৈ নাথাকে আৰু ন্যায়ৰ প্ৰশ্নত যাতে কোনো ধৰণৰ আপোচ কৰা নহয়, তাৰ বাবে ৰাইজে এক নিৰপেক্ষ আৰু স্বচ্ছ তদন্তৰ দাবী অব্যাহত ৰাখিছে। ভুক্তভোগী নাবালিকা গৰাকীৰ অকাল মৃত্যুত সমগ্ৰ অঞ্চলটোত গভীৰ শোকৰ ছাঁ পৰিছে। স্থানীয় ৰাইজ আৰু বিভিন্ন মহলে শোকসন্তপ্ত পৰিয়ালটোলৈ আন্তৰিক সমবেদনা জ্ঞাপন কৰাৰ লগতে ৰোশনী চেত্ৰীৰ বিদেহী আত্মাৰ চিৰশান্তি কামনা কৰিছে আৰু এই জঘন্য অপৰাধৰ বিৰুদ্ধে সমাজৰ প্ৰতিগৰাকী নাগৰিকক সদায় সৰৱ হৈ থাকিবলৈ আহ্বান জনাইছে।