तीन दिवसीय गोर्खा सांस्कृतिक नृत्य कार्यशाला ग्रेटर चेङ चेङ बिलमा सम्पन्न
तीन दिवसीय गोर्खा सांस्कृतिक नृत्य कार्यशाला ग्रेटर चेङ चेङ बिलमा सम्पन्न
ग्रेटर चेङ चेङ बिल, पश्चिम कार्बि आङलङ – २४ जुलाई २०२५
गोर्खा समुदायको परम्परा, कला, र सांस्कृतिक सम्पदाको संरक्षण तथा नयाँ पुस्तामा चेतना विकास गर्ने उद्देश्यका साथ ग्रेटर चेङ चेङ बिल शाखा, अखिल असम गोर्खा छात्र संघ (आग्सु) पश्चिम कार्बि आङलङ जिल्ला समितिको तत्वावधानमा तीन दिवसीय गोर्खा सांस्कृतिक कार्यशाला २२ जुलाईदेखि २४ जुलाई २०२५ सम्म स्थानीय प्राथमिक विद्यालय प्राङ्गणमा सफलतापूर्वक सम्पन्न भएको छ।
कार्यशालामा गोर्खा समुदायका परम्परागत खुकुरी नृत्य र मारुनी नृत्यको प्रशिक्षण दिइएको थियो। कार्यशालाका प्रशिक्षकको रूपमा आग्सु पश्चिम कार्बि आङलङ जिल्ला समितिका सांस्कृतिक सचिव श्री पिंकु पौडेलले खुकुरी नृत्य र शिक्षा सहसचिव श्री अजय गुरूङले मारुनी नृत्यको प्रशिक्षण दिएका थिए। गाउँका भाइबहिनीहरूको उत्साहजनक सहभागिताले कार्यक्रममा जीवन्तता थपेको थियो।
कार्यशालाको अन्तिम दिन २४ जुलाईको समारोहमा आग्सु पश्चिम कार्बि आङलङ जिल्ला समितिका मुल सचिव श्री भुजेल, आम्रेङ–कपिली आञ्चलिक समितिका सभापति श्री रोशन शर्मा, सांगठनिक सचिव बिमल घिमिरे, कार्यालय सचिव गोविन कार्की र कार्यकारिणी सदस्य सन्तोष कार्की पर्यवेक्षकका रूपमा उपस्थित थिए।
समापन समारोहमा ग्रेटर चेङ चेङ बिल शाखाका सभापति राहुल क्षेत्री, समाजसेवी मुक्तिनाथ घिमिरे, मातृशक्ति प्रतिनिधिहरू, शिक्षक, विद्यार्थीहरू र गाउँका बासिन्दाहरूको उल्लेखनीय उपस्थिति रहेको थियो। कार्यक्रमको आयोजना, व्यवस्थापन र सफल कार्यान्वयनका लागि शाखाका पदाधिकारीहरू, स्वयंसेवकहरू तथा सम्पूर्ण समाजले सक्रिय भूमिका निर्वाह गरेका थिए।
कार्यक्रमपछि सभापति राहुल क्षेत्री र शाखाकी मुल सचिव तनिषा कार्कीले संयुक्त रूपमा सम्पूर्ण सहभागी, सहयोगी तथा आगन्तुकहरूलाई आभार प्रकट गर्दै यस्तो खालको सांस्कृतिक गतिविधि भविष्यमा पनि निरन्तरता दिइने प्रतिबद्धता जनाए।
तीन दिनसम्म चलेको यस ऐतिहासिक कार्यशालाले ग्रामीण स्तरमा सांस्कृतिक जागरण ल्याउनुका साथै गोर्खा समुदायको मौलिकता र पहिचानको संरक्षणमा उल्लेखनीय योगदान पुर्याएको सहभागीहरूको धारणा थियो।
Super Admin
Editor-in-Chief
